"Эльвира Попова"
Эльвира Попова (28 Теле 1980 ий, Шернур кундем Шӱдымарий ял) — марий мурызо, Олык Ипай лӱмеш премийын лауреатше.
Шернур кундем Шудымарий ялыште шочын. 10 класс деч вара (1996 ий) Йошкар-Олаш Тӱвыра да сымыктыш колледжыш эстрада пӧлкаш шинчымашым погаш толын.
1998 ийыште "Ший памаш" конкурсын, 1999 ийыште "Эстрадный вернисаж" конкурсын лауреатше лийын. 2000 ийыште Моско олаште "Дельфийские игры-2000" конкурсыш ушнен.
2000-ше ийыште Я.Эшпай лӱмеш Кугыжаныш Марий филармонийын солисткыже лийын. 2006 ийыште Олык Ипай лӱмеш премийын лауреатше лӱмым сулен.
Икымше кугу сольный концертым 2007 ийыште Йошкар-Олаште рӱдӧ площадьыште мурен.
Шуко мурыланже семымат, мутшымат Эльвира шке воза. 10 Пеледыш 2013 ийын Марий Эл Республикын Вуйлатышыже Л.И.Маркеловын Кӱштыкшӧ почеш Эльвира Поповалан Марий Эл Республикын сулло артистше лӱмым пуымо.